Jan. 21, 2026 -

Dili, 21 Janeiru 2026

Prezidente CNE, Dr. José A. da Costa Belo Pereira, kuarta feira semana ne'e, tuku 15:00 lorokraik, prezide Plenaria extraordinaria ne'ebe partisipa hosi membru sira hanesan Vise Prezidente CNE, Sekretaria CNE no Komisariu nain rua no Dirijentes Sekretariadu Jeral CNE ho nia estrutura sira.

Plenaria ne'e hodi deskuti kona-ba Planu atividade CNE nian iha tinan 2026, ne'ebe tuir kalendariu eleitoral nian nudar tinan preparasaun ba eleisaun sira tuir mai, hanesan eleisaun Prezidensial no Eleisaun Munusipal.

Iha tinan 2025, haktuir ba atividade ne'ebe CNE implementa, Orgaun Eleitoral ne'e realiza atividade Edukasaun Sívika hodi divulga informasaun sira ligfadu ho eleisaun munisipal nian ho métodu oi-oin, hanesan seminariu, workshop, enkontru komunitariu ho entidade sira iha munisipius, postu to'o suku, sertame inklui debates públika entre partidu polítiku nivel lokal nian iha kada munisipiu, RAEOA no Ataúro.

Ba tinan 2026, CNE sei kontinua realiza sosializasaun no divulgasaun ba sidadaun eleitor sira iha munisipius oinsa bele hatene diak liu tan sira nia direitu no dever síviku iha eleisaun sira. CNE mos sei kontinua realiza debates ba partidu Polítiku sira iha nivel lokal nian, tuir rekomendasaun sira ne'ebe Partidu Polítiku aprezenta. Alende ne'e CNE sei hala'o vizita ba sede Partidu Polítiku sira iha kada munisipiu halo surumutuk no dialogu oinsa bele rona mos sira nia lian, aumesmu tempu promove mos esklaresimentu sira ba aktu eleitoral iha Timor Leste.

Haktuir ba programa Governu Dasia, iha tinan 2027 Governu komprometidu atu realiza eleisaun munisipal no desentralizasaun ba poder lokal bazeia ba rezultadu avaliasaun kondisaun mínimu iha munisipiu sira ne'ebe prienxe ona rekezitu ne'ebe Ministeriu Administrasaun Estatal realiza.

Plenaria ne'e, halo mos aprovasaun ba Akta sira CNE nian.

#DEPTMDCNE26