Lei 16/2021 alterasaun datoluk ba Lei 5/2006 Art. 8 letra d, hateten katak kompeténsia CNE nian ida mak promove esklaresimentu objetivu ba sidadaun sira kona-ba aktu eleitorál.

Hare ba kompetensia refere durante tinan 2024 CNE realiza edukasaun sívika iha teritóriu laran ho objetivu eleva eleitór nia koñesimentu ba aktu eleitorál ho finalidade hasa'e taxa partisipasaun eleitór nian iha kulkér eleisaun mak mosu.
Iha ámbitu eleisaun suku no preparasaun ba eleisaun munisípiu, Comisão Nacional de Eleições realiza atividade edukasun sívika ho frekuensia dala 148 no hetan partisipasaun partisipante ho total rihun sanulu resin neen atus ida walunulu-resin-rua (16.182). Hosi total eleitór ne'e kompostu hosi feto 6.930 (42,8 %) no mane 9.252 (57,2 %).
Atividade ne'e, CNE muda estratéjia hodi envolve entidade relevante sira hanesan Sekretariu Estadu ba Igualdade (SEI), Autoridade Munisipál, Organizasaun Feto , Organizasaun ba Ema ho Defisiénsia, no Organizasaun Juventude sira hodi divulga informasaun relasiona ho programa asuntu jéneru no inklusaun, polítika ba dezenvolvimentu lokal ninian, ho mós asuntu sira kona-bá dezenvolvimentu juventude iha atividade edukasaun sívika.